政情：盧煜明獲獎與楊振寧看齊
政府一直提倡發展高科技產業，有無成效見仁見智，不過本港的確不缺科研人才，好似中文大學李嘉誠健康科學研究所所長盧煜明教授，憑無創產前診斷技術獲獎無數，近日又再增添一項殊榮，獲美國國家科學院頒授外籍院士榮銜，屬科學界最崇高榮譽之一，以往同得此榮銜嘅包括諾貝爾物理學獎得主楊振寧、美籍華裔數學家丘成桐、香港大學校長徐立之等。
研無創產前測胎兒DNA
美國國家科學院日前增選八十四名院士以及二十一名外籍院士，盧教授榜上有名。盧教授九七年起研究無創產前診斷技術，只需為孕婦抽血，就可檢測胎兒DNA，從而診斷唐氏綜合症等多種疾病，免卻傳統「抽羊胎水」可能導致流產嘅風險，貢獻甚大。
盧教授對獲選感極度榮幸，佢話呢項院士銜好少授予非美國公民，無諗過自己會獲選。佢話自從前年將無創產前診斷推展到臨床服務後，短短一年半已有逾十五個國家採用，完成廿五萬次測試，準確度達九成九。盧教授亦正研究用相同技術診斷癌症，估計最快五年內，可推出同時診斷多種早期癌症嘅測試，增加病人存活機會。