政情：房會宣傳片 臭史密冚
今年係香港公營房屋發展六十周年紀念，香港房屋委員會特別製作咗條宣傳片，但正如大部分宣傳政府政策同歷史嘅廣告片一樣，宣傳片內容都係隱惡揚善，對禍港殃民十多年嘅「八萬五」政策同「貪曾」前特首曾蔭權爵士嘅「零居屋」暴政隻字不提，教壞細路兼歪曲歷史。
該段名為「香港公營房屋發展六十年」嘅宣傳片，片長逾十五分鐘，開頭講有關香港公營房屋起源嘅內容都尚算忠於史實，包括一九五三年嘅石硤尾木屋區大火、五四年興建香港首批徙置廉租屋、七二年推出十年建屋大計等。
鹹水樓 短樁醜聞隻字不提
但講到過去六十年嘅公屋建築史時，宣傳片就只談歷代嘅公屋設計特色，隻字不提當年驚動全港、同樣由貪腐問題引發嘅鹹水樓同短樁醜聞。
至於同為香港房屋特色之一嘅居者有其屋計劃，宣傳片只簡單提到居屋計劃係由七八年開始，○三年結束，之後到一一年又突然有番，完全無提及港府當年提出「八萬五」推冧樓市，導致其後要喝停居屋計劃，以及貪曾政府點樣漠視民意，遲遲唔肯復建居屋嘅史實，配合晒老董當年嘅「唔講就唔存在」思維。