政情：廢鑊「解決唔到問題」
平等機會委員會主席周一嶽上任後未有建樹，就已經因為收禮風波畀人話佢「污名化」平機會，不過佢依舊自得其樂，有歌繼續唱。尋日新民黨立法會議員田北辰(田二少)喺一個社企活動同周一嶽碰頭時都忍唔住寸周一嶽，話佢經常都唱歌咁噃。而周一嶽就答咗句︰「唱歌解決唔到問題嘅。」查實平機會可能只係求佢咪佗衰家，都唔旨意佢會解決到問題。
田二少尋日出席社企鑽的青少年社企意念創作比賽活動，同周一嶽齊齊做評判。田二少話平時搭的士啲司機都開到架車左搖右擺，佢都試過因為咁撞親膊頭，萬一自己日後要坐輪椅，搭的士時最關心嘅都係安全問題，所以佢一個月前就扮跛坐輪椅搭鑽的。佢話，佢搭鑽的時司機淨係幫佢上落車、綁安全帶都用咗半個鐘，真係細心又穩陣。
寸人者亦被寸 田北辰面懵
雖然田二少大讚鑽的，不過就嫌九十蚊一程收費太貴，話最好減到二、三十蚊一程，等啲殘疾人士可以出多啲街。鑽的行政總裁梁淑儀就呻的士牌費好貴，仲暗寸經營時裝生意嘅田二少︰「鑽的可以二、三十蚊嘅話，你啲衫都可以幾蚊一件啦！」田二少即場被寸到面懵懵。