政情：劃區風暴 勢吹散白鴿
政府有意重劃立法會選區，唔同劃法對政黨固有勢力有唔同嘅影響，如果採取將新東嘅將軍澳劃入九東、將新西嘅葵青劃入九西嘅劃法，白鴿黨落力栽培嘅新東、新西勢力嘅第二梯隊就會打散晒。白鴿黨已經係老化、內訌周身病，外憂內患乜都齊，如果再唔痛定思痛下定決心改革，可能隨時會喺選舉洪流中被瞬間蒸發。
第二梯隊爭上位內訌
白鴿黨內第二梯隊同八十後一直想問鼎立法會寶座，但因為幾個大佬多年霸住議席唔放，所以令佢哋上位無期。今屆立法會選舉後，黨內幾個大佬都暫時表明下屆唔會再玩，尤其係講明唔再參選嘅主席劉慧卿同失落新西議席嘅李永達。面對大佬終於肯出讓議席，唔少新生代即時蠢蠢欲動力求表現，希望可以得到大佬輩垂青揀佢出選。
新東方面，上次有份代表白鴿黨出選新東嘅副主席蔡耀昌，近來盛傳同下屆有份落場嘅卿姐愛將柯耀林已經不斷有明爭暗鬥，希望盡早將「對手」淘汰。
氣數已盡 「慘不忍睹」
至於去年立會選舉後一鋪清袋嘅新西，除咗兆康區議員陳樹英有機會捲土重來外，據知黨內已經屬意由石蔭區議員尹兆堅代表白鴿黨出戰。不過，新西仲有幾個八十後區議員正磨拳擦掌準備上戰場，如果白鴿黨唔肯回應訴求，可能又會引起另一場分化。
不過，下屆立法會選舉選區如何劃界仍然係未知之數，前排傳聞政府會開拓新界北選區，但最近就有傳言話當局已經放棄「新界北」計劃，反而將新東新西部分選區劃入九東九西範圍，當中包括西貢、將軍澳同葵青等區。眾所周知，西貢同將軍澳係卿姐重要票源之一，如果被強行劃走，無論對蔡耀昌定係柯耀林，都必然不利。而葵青亦都係白鴿黨另一重要票倉，如果呢啲票突然劃咗去九西，咁白鴿黨喺九西不足以贏，但喺新西已經雞毛鴨血潰不成軍，情況喺新東亦然。如果選區真係咁劃法，四年後嘅白鴿黨，真係慘不忍睹。唔通真係氣數已盡？