中環出更：梁高美懿帶挈全家贏馬
唔少運動員出征時都會着住「幸運戰衣」上場，原來恒生銀行前女大班、全國政協委員梁高美懿（Margaret）都有一套「幸運套裝」，帶挈佢一家發財。尋日沙田馬場舉行賽事，Margaret全家總動員出動撐愛駒，結果好事成雙，頭馬拉完又拉，仲要捧走埋個獎盃，瓜分一百六十五萬元獎金，認真和味。卓妮留意到Margaret着住嘅呢套紫色套裝裙，之前有次拉頭馬都着過，唔通紫色特別旺佢？
一日拉兩次頭馬腳頭好
出名孝順嘅Margaret尋日拖實母親，與丈夫梁承達、兩位千金偉妍、偉端及女婿齊現身，撐佢哋一家共同擁有嘅愛駒「神童」，結果爆冷二十三倍跑出。冇諗過會贏馬嘅梁家欣喜若狂，齊齊高興拉頭馬。相隔一粒鐘，身為皇仁仔嘅梁承達同校友合買嘅靚駒「皇仁勁駒」又喺盃賽中脫穎而出，開心程度可想而知喇。卓妮上前讚Margaret幸運，佢就笑指係媽媽「腳頭好」喎！佢仲透露，舉家都有落注撐愛駒，收穫甚豐。