一不離二，二不離三，三不離貪。家陣嘅香港真係貪婪成風，一個前行政長官曾蔭權已經貪盡便宜，一個前廉政專員湯顯明亦係貪杯好酒，失驚無神又整多一個前問責局長，貪嘅係價值一萬大元嘅名貴禮物。再係咁搞落去，廉潔奉公嘅核心價值遲早煙消雲散，好似逃唔過清拆命運嘅古物古蹟一樣成為香港人嘅集體回憶。
明明貪曾同貪湯嘅所作所為備受輿論關注o架啦，邊一個前問責局長咁唔生性又去貪圖人哋嘅饋贈呀？咪就係現任平等機會委員會主席周一嶽囉，呢一個前食衞局局長出席由電訊商同商業電台合辦嘅「命運交響廳分享會」活動，竟然唔避嫌收取主辦機構送出嘅禮物，包括最新款嘅Samsung Galaxy S4智能手機一部，連兩年無限流動數據及通話費服務。根據網上資料顯示，Samsung Galaxy S4智能手機市面嘅淨機價超過五千元，如果透過電訊商連同兩年合約以零機價方式購買，每月費用最低都要四百元。換言之，一部手機加二十四個月服務合約總共約值一萬元。
《防止賄賂條例》第三條規定係咁講嘅，任何公職人員未經特首特別批准，一般只能收受價值最高五百元嘅禮物，若然送禮者與其公職相關，更加完全唔可以接受禮物。
周一嶽話就話唔會以個人名義收取咁貴重嘅禮物，會捐出去畀平機會同事抽獎，之但係即使送畀成個平機會都有瓜田李下之嫌啫。正如公民黨立法會議員陳家洛話齋，周一嶽警覺性極低，畀人嘅感覺係代表機構接受，擔心陷平機會於不義。陳家洛仲批評︰「呢個或者係前特首曾蔭權前朝政府後遺症，曾蔭權、湯顯明同周一嶽呢『三個活寶貝』，或者有啲癮戒唔甩。」連民建聯議員陳克勤都睇唔過眼，直斥周一嶽唔應該貪埋呢啲小便宜。
一二貪，貪二一，一二貪四五六七。功夫茶愈來愈擔心，香港將會打回原形，退化到好似六、七十年代嘅貪腐世界。本來呢，香港勝在有ICAC，蒼蠅老虎一齊打，經過幾十年努力贏得肅貪倡廉嘅崇高聲譽。可悲嘅係回歸以來港人治港嘅土炮官僚不斷墮落，就算唔係貪圖實物，都會貪圖寬敞空間，違規僭建蔚然成風，「掘深咗」變成二千呎地下行宮都夠膽死。周一嶽已經有僭建前科o架喇，今次又收取名貴禮物，簡直視法紀如無物。
本地官場出現一隻又一隻「金翅墮落鳥」，廉署如果唔想名譽掃地，扚起心肝做一個打雀英雄啦！