新政府問責團隊其中一個任務係要更多接觸並了解生活於內地嘅港人需要，據聞官場中人都不敢怠慢，除沿用本港商會嘅內地分會，同喺當地工作嘅港人保持聯繫外，就連由港人喺當地發起嘅同鄉會都唔放過，新政府為咗了解港人訴求認真招數盡出。
有官場中人透露，港府過往時有同內地港人接觸，主要係透過本港商會嘅內地分會，以及部分大機構同企業接觸港人。不過，為咗更全面了解內地港人嘅需要，淨係靠呢啲慣常做法係唔足夠嘅，惟有開始發掘更多代表內地港人嘅組織，佢哋最新方法就係透過同鄉會做工夫。
該名官場中人舉例話，上海本身有志同道合嘅港人成立上海‧香港同鄉會，顧名思義係聯繫喺上海生活嘅港人，呢個就係一個好好嘅平台，了解港人喺當地嘅聚腳點。佢形容，呢類團體唔需要由名人負責統籌，只要有佢哋聯絡方法，將來港府想搵對口人物都可以容易啲。
話時話，港府高層官員每年都有唔少機會到內地訪問，如果每次都如願搵到部分當地港人，基於「積少成多，聚沙成塔」嘅理論，港府遲早可以為內地港人做一份名冊，到時有乜需要相信就可以一目了然喇。