立法會不時都被人話係吹水台，尋日又再印證咗呢種講法，點解？話說議員個人利益監察委員會尋日開會，用咗兩小時討論議員申報金錢利益嘅問題，但最後都係齋講同發調查問卷。開會傾咁耐都似乎冇乜用，不如下次直接發問卷畀全體議員可能仲有效率。
委員會討論《議事規則》第83Ａ條有關規定披露金錢利益事宜，香港總商會代表林健鋒同航運交通界易志明異口同聲話，唔明點解書面申報完利益，開會發言前又要再申報多一次。法律界郭榮鏗就話，唔同意佢哋講法，認為做議員有責任去判斷幾時要申報。雖然呢個委員會只有幾個委員，但個個都意見多多，最後又係得個吉，始終要發問卷諮詢全體議員。
另外，委員會又公布早前完成有關委任獨立人士為專員處理投訴嘅問卷調查，其實呢個議題由上屆立法會已開始傾，但最後又係決定發問卷諮詢全體議員。
秘書處喺今年二月發出問卷，並收回六十九位議員回覆，當中近五成人反對委任獨立人士為專員，同意嘅只有三成三人，其他無意見。由於大比數反對，所以委員會最終決定以後都唔委任獨立人士為專員。