政情：楊紫霞展藝術成果
有人覺得從事藝術工作有理想但「無錢途」，又覺得搞藝術係有錢人嘅玩意，但原來何東後人楊紫霞（Wendy Yeo）踏上藝術之路，都要經過努力爭取返嚟嘅。Wendy係何東外孫女，佢媽咪何孝芝乃何東平妻張靜蓉所出，系出名門應該大把本錢玩藝術，但原來當年家人都反對佢讀藝術，想佢有份「正當職業」。
考入倫大斯萊德美術學院
Wendy話，當年佢就揀咗一科好「正當」嘅藝術科目，就係去香港大學讀建築系。一年後，Wendy憑住展出時嘅一句賞識，再向家人爭取讀藝術，點知被「回價」要佢考入最好嘅藝術學院先有得傾，好彩最後佢成功考入英國倫敦大學斯萊德美術學院（The Slade School of Fine Art），成功爭取修讀藝術。
Wendy現長居於英國，不時巡迴各國展出作品，今次返港喺上環舉行水彩畫展，作品靈感源於多年旅行經歷，當中亦有佢對香港嘅印象。闊別香江二十年嘅Wendy話，香港真係變咗好多，最可惜係依然唔多重視藝術教育。佢話，藝術對後人了解歷史有一定作用，如果冇金字塔，世人都未必了解到古埃及文明。咁唔知佢對何東花園保育失敗又有咩睇法呢？呢位何東後人笑笑口話，屋企嘅事都係唔講咁多喇！