政情：屋企聽到立會響鐘 葛珮帆恐「布」幻聽
財政預算案拉布戰持續，人民力量三子同社民連「長毛」梁國雄慣用策略係車輪戰發言拖延時間，但當講到疲倦時就可以使出另外一個撒手鐧，就係響鐘要求點算開會法定人數。不過，連日來嘅響鐘聲，令葛珮帆（EQ）疑似出現幻聽。另外，有議員因為拉布戰連覆診時間都無，認真慘情。
原來係電視播拉布戰
立法會拉布戰持續咗五日，其中EQ自爆，有前輩事前張揚聽得多響鐘聲可能會神經衰弱，佢起初對此都半信半疑，但之後返到屋企，有次入到洗手間時又聽到呢個響鐘，佢驚覺係咪真係兌現前輩所言時，先發覺原來係電視機播緊拉布戰嘅新聞片段，當時個心先至定番少少。
拉布戰搞到有議員出現疑似幻聽之外，據聞有議員想病向淺中醫都只可以一拖再拖。話說有某建制派議員原本打算前日去診所覆診，但係因為拉布戰行唔開所以要放棄覆診，問佢究竟有乜病痛，該議員就話係私隱冇再多講喇！