政情：工聯會彪入九西
去年立法會選舉，工聯會一心諗住以「風車效應」令工聯會陳婉嫻（嫻姐）以高票勝出超級議席，點知最後五大選區中獨漏九龍西冇派人參選，搞到嫻姐差啲遭遇滑鐵盧。據聞工聯會都知道風車效應嘅癥結，就係要五塊風車葉都要齊晒，所以勞工界鄧家彪（Bill）就疑似做先頭部隊到九龍西插旗，仲搵咗四通八達嘅旺角開辦事處，莫非阿Bill已準備衝入九龍西做開荒牛？
嫻姐前年以超高人氣高票當選黃大仙區議員後，去年乘勝追擊出戰立法會超級議席，原本諗住實冇失拖，點知喺報名前夕接連發生插曲，先係原定出戰九龍西嘅建築業總工會理事長周聯僑「被勸退」，令到風車效應斷咗一塊車葉，加上後期建制派內部「鬼打鬼」鬥搶票，選舉期間一度告急，最終嫻姐喺五名當選者得票中僅排第四位。
土瓜灣大本營 冇立會代表
雖然距離未來兩場大型選舉仲有幾年，但前車可鑑，工聯會已密密開始做嘢，首先要打通嘅自然係九龍西。有消息話，其實打通九龍西有重要戰略意義，事關該會大本營喺土瓜灣，但九龍西就一直冇立法會代表，因此阿Bill首先喺九龍西掛橫額增加人氣，其次喺去年底低調地喺旺角樓上舖開咗個四百呎辦事處，位置四通八達，但月租就要一萬五千多元。有地區人士估計，阿Bill突然殺入九龍西，分分鐘係為咗三年後參選做準備。
對於呢個地區傳聞，阿Bill未有正面回應，強調自己喺旺角設立辦事處，一來係接收番上屆勞工界議員潘佩璆嘅職員，二來旺角呢個地方四通八達，方便同各大工會代表開會。
洩露玄機 「暫時做住先喎」
不過，之後佢又疑似洩露玄機話，黃國健同麥美娟分別服務緊九龍東同新界西，而九龍西就暫時由佢做住先喎，因此九龍西街坊想搵佢幫手都來者不拒。究竟阿Bill會否成為九龍西開荒牛，相信未來會有更多端倪可以睇到。