中環出更：愛滋遺孤製袋 杜聰做代言人
千億新抱徐子淇擔任慈善大使嘅智行基金會，早前搞咗個夾Band慈善音樂會，籌錢為內地愛滋遺孤送暖。卓妮見基金創辦人杜聰成晚孭住一個環保袋，造型出位，細問之下，原來環保袋印住嘅圖案係啲愛滋遺孤同家人嘅作品，製成環保袋後既可出售籌款，又可教受助人自力更生，難怪杜聰不惜放下大男人形象，都要孭住做代言人喇。
智行慈善音樂會 名人力撐
當晚音樂會重溫咗上世紀六、七十年代經典英文金曲，中華總商會永遠榮譽會長張成雄夫婦一早就入場，唔通佢都係Band友？張成雄笑笑口話唔係，其實佢係去撐音樂會籌委會副主席許義良（Frankie）場。Frankie係一間日本餐廳嘅老闆，業餘夾Band幾十年，當晚亦上台露兩手。
至於「香港手套大王」詹氏第二代詹嘉莉（Kelly）三姊妹都去捧場，雖然Kelly唔係「經典」人，但都買咗十幾張門券做善事，事關佢與曾經紅極一時嘅主音歌手Dorinda相識好多年。Kelly話，內地愛滋遺孤多數冇感染病毒，卻要面對貧窮及歧視，好需要社會伸出援手。