五月一日黃金周，有人歡樂有人憂，功夫茶真係百感交集，集到心緒不寧嗰隻。
歡樂嗰一筆都唔使多講啦，每逢大時大節國內同胞放假，就好似候鳥南飛咁樣來港消費，排山倒海嘅消費大軍幾乎逼爆玻璃，做生意嘅商家佬自然喜上眉梢，一個二個笑到見牙唔見眼。今年黃金周仲有一個特性，就係適值近日黃金價格拾級而下，吸引內地購物狂來港掃貨，金鏈、金鈪以及金戒指等等黃金產品炙手可熱，黃金周名副其實金光閃閃黃黚黚。
滿城盡見黃金客，歡樂成咁仲有乜嘢好憂呀？唉，正正由於國內同胞洶湧而至，功夫茶非常擔心一個唔覺意又會傳來一發不可收拾嘅瘟疫。你知啦，H7N9禽流感席捲神州大地殺人無數，由北至南相繼有省市淪陷，家陣連毗鄰廣東嘅福建、江西以及湖南都出現H7N9確診病例，位處廣東之南嘅香港隨時城池不保o架。
香港大學微生物學系講座教授袁國勇係咁講嘅，五一期間或之後香港可能出現首宗人類感染H7N9病例。東莞市活禽市場發現其中一個雞隻樣本出現疑似H7亞型禽流感病毒，特區政府雖然話案發現場十三公里範圍之內冇供港雞場，暫時毋須停止內地活雞供港，不過食物及衞生局局長高永文預警，病毒殺入廣東嘅風險增加，將會同內地專家研究疫情。
最令人憂心忡忡嘅係，港式官僚一向撞板多過食飯，尤其係面對病毒入侵嘅可怕場面，硬係危機意識嚴重不足。喂，點解衞生黑點仍然污糟邋遢o架？點解公立醫院照舊把關鬆懈o架？點解口岸檢疫一樣中門大開o架？特別係口岸檢疫呢一關，萬一有來自祖國嘅帶菌者如入無人之境，十年前嘅沙士疫情恐怕要重演咯！
冇錯，專家學者同志們誓神劈願話H7N9禽流感尚未變種到人傳人，目前嘅狀況始終係禽傳人，問題係十年前嘅沙士官腔夠話「社區冇爆發」啦，結果二百九十九人死於非命呀，冇陰功！
旅遊業議會估計，黃金周假期總共會有九百幾個內地旅行團抵埗，為咗避免再發生類似世通假期逼遊客瞓巴士嘅事件，議會要求旅行社必須遞交酒店確認書，證明已為團友預訂房間，暫時未有團隊因為提供唔到酒店確認書而被拒來港。功夫茶想問一問高永文局長，若然酒店之內發現禽流感帶菌者，會唔會將整座酒店封鎖隔離呢？即係咁，功夫茶最想知道嘅係本地負責搞衞生嘅官老爺有冇乜嘢應急方案咁解啫，唔好到時鎅手唔成勢，顧得個頭又甩咗隻髻。
總而言之，唔係靠嚇，迎接黃金客嘅時候，必須打醒十二分精神力拒疫魔來犯！