前廉政專員「貪湯」湯顯明被揭發使公帑送禮宴客無上限，又涉嫌公器私用，公帑開飯攜眷赴會，正當立法會多個政黨循多道討伐貪湯，呼喚貪湯速速現身解畫之際，剛由北京返港嘅商界林健鋒回應呢單嘢時，就講咗等於冇講。
佢話既然立法會帳目委員會都話會調查，又或會傳召涉事人士作證，加上審計報告「數字入面有數字」，所以應等帳委會做咗嘢先。不過，問題係審計署話今次審計報告只係審查廉署社區關係處工作，並唔係全面審查廉署嘅酬酢開支，照咁睇，無論林健鋒點反芻報告「數字入面有數字」，應該都唔會有咩結果囉！
