政情：食「一夜情」 鍾國斌話正
中華廠商聯合會早前舉行會董會晚宴，一眾成員拉大隊去一家潮州菜館品嘗美食，作為會董之一嘅立法會紡織及製衣界議員鍾國斌（Felix）都有份。話說當晚除一般潮州美食外，會董蔡少森仲帶咗條私伙鹹魚同大家分享，呢條鹹魚名為「一夜情」，Felix食過都話「一夜情」正呀！
只鹽醃一晚 命名由來
呢條鹹魚之所以叫做「一夜情」，係因為廚師會先將原條魚用鹽醃過夜，而因為只醃一晚，所以肉質依然鮮嫩滑溜，唔會得個鹹字。蔡少森話，佢近期喺內地自設環保室內養殖魚場，培育來自澳洲嘅翡翠魚，餵飼嘅魚糧、水溫控制都符合環保條件，等大家食得安心啲。
當晚仲有另一位會董葉志光喺台灣帶咗啲珍貴嘅牛樟芝返港，炖成養生湯畀大家品嚐，大家第一時間唔係飲靚湯，而係拎起筷子爭住試食煲過湯嘅牛樟芝。據講牛樟芝可以增強免疫力，飲咗抗流感病毒就最啱喇。