政務司司長林鄭月娥牽頭推出「家是香港」活動，頭炮係「全城清潔運動」，但原來要分配三司十二局落區做社區清潔騷都唔係咁容易，事關有部分地區嘅當前議題，直接由某些高官負責推銷，為免惹來爭議就盡量要避開，其中一個三煞位就係屯門區。
知情人士話，政府早前想喺屯門曾咀興建焚化爐遇到重重障礙，本身屯門鄰近新界東北發展計劃，加上區區都有骨灰龕計劃，所以為免令關注團體出動狙擊主事官員，所以經評估後，唔建議環境局局長黃錦星、發展局局長陳茂波同食物及衞生局局長高永文揀呢區做騷，改為搵咗相對政治中立嘅公務員事務局局長鄧國威頂上。
避無可避 小肥張中招
此外，個別高官落區地點亦要較為謹慎，就以黃錦星為例，好似將軍澳堆填區就要避免佢去，免得被關注關閉堆填區人士搶晒鎂光燈，最後黃錦星到咗牛頭角做清潔騷，事實亦證明活動最終無風無浪。不過，亦有部分突發事件令港府官員難以事前評估，好似勞工及福利局局長張建宗到九龍城落區時，就被碼頭工潮事件狙擊，咁就點都避唔到喇！