政情：轉軚幫拉布泛民無口齒
立法會拉布四子就財政預算案奮力「拉布」，其他泛民主派為免背上癱瘓政府同民生之罪名，當初誓神劈願講明唔會支持拉布。點知尋日人民力量三子要去法庭應訊，得番社民連梁國雄（長毛）獨撐大局，當主席曾鈺成話長毛發言內容重複，仲禁止埋佢發言時，泛民竟然喺呢個時候反口幫手拉布。不過，佢哋就死撐話唔係拉布，而係有需要先至發言喎，真係乜都佢哋講晒。
有份拉布嘅人民力量陳偉業、黃毓民同陳志全尋日就去年七．一遊行非法集結案出庭應訊，留低長毛喺立法會獨撐大局。長毛朝早約九點鐘開波就出招要求點算人數，點知建制派坐定定，結果唔夠半分鐘就令長毛要開始發言。不過，期間長毛就不斷被民記蔣麗芸挑機，話佢嘅發言同議程無關同重複，主席亦多次作出警告。長毛死撐咗大約半個鐘，已經被主席下令禁止發言。
投訴大字報 梁繼昌嘥時間
長毛冇得發言，原本係「剪布」、結束該輪辯論嘅大好機會，但新民主同盟范國威就喺呢個時候提出規程問題，撐長毛冇重複發言，但結果失敗。工黨張超雄見狀後就接力幫口發言，但捱咗半個鐘，始終都係要結束該輪辯論。張超雄幫口之後，泛民就好似解禁咁，喺辯論削減特首薪金時你一言、我一語。之後民主黨劉慧卿同公民黨梁家傑都唔執輸，加入噏埋一份。劉慧卿更加話有街坊想佢哋「拉布」，似乎想借街坊做反口幫手拉布嘅擋箭牌。
雖然公共專業聯盟兩位議員冇發言，但成員之一嘅會計界梁繼昌就不滿反「拉布」嘅工聯會王國興喺會議廳內貼書法大字報覆蓋面太大，有礙觀瞻，於是向主席投訴。不過，主席就話王國興鄰近嘅議員都有份幫佢貼大字報，應該冇造成阻礙；至於係咪有礙觀瞻，都係等議員自己掌握分寸喎。雖然最終投訴不成，但都間接幫手拖延咗部分時間囉。