中環出更：晶晶未見肚 震寰唔送禮
跳水公主郭晶晶去年下嫁港協暨奧委會會長霍震霆之子霍啟剛，最近有傳晶晶疑有身孕，霍震霆前日被問及此事時連番叫大家直接問佢個仔，不過一直笑容滿面。尋日霍震霆嘅細佬、港區人大代表霍震寰出席工聯會慶祝成立六十五周年酒會時，被追問同一問題時首先反問「爸爸（即啟剛）講咗未」，至於問到係咪要買定禮物，霍震寰終於開金口話依家仲早，仲未見到個肚喎。
鄭耀棠訪京懶神秘
講番工聯會尋日個酒會，由於立法會拉布戰持續，工聯會六名議員事先張揚話未能出席，其他建制派議員都行唔開，工聯會榮譽會長鄭耀棠之後爆料，話有會員同佢投訴點解唔見晒工聯會六名議員，棠哥就好無奈話佢哋無法子，因為要好似廣告話齋「坐定定喺度，企定定喺度」。
有政團上周末率先訪京，又有機會同主管港澳事務官員會面，究竟幾時到工聯會訪京呢？棠哥起初講得極玄妙，表示「要去嘅時候就會去」。不過呢個問題應該要問會長林淑儀同理事長吳秋北，當問到吳秋北時，佢又話要同棠哥商量吓。最老實都係林淑儀，佢話短期內就唔會訪京，希望下半年大家夾到時間成行喎！