學位僧多粥少，學子望門興嘆，考大學被形容為「千軍萬馬過獨木橋」，真係冇講錯。到咗今時今日，情況仍然冇改善，因為資助大學學位供不應求，每年都有唔少符合資格嘅考生被拒諸門外，講起都幾無奈。
不過咁，由於出生率持續低企，適齡學生人口下降嘅情況逐漸蔓延到專上教育，升學率未來有望提升。教育局話喎，未來十年中六學生人數將由七萬一千幾下降到四萬六千幾，減幅超過三成半。預計到二○一六年，所有考獲最低升學要求嘅學生都可以升讀學位課程，而副學士課程更可能出現供過於求嘅情況，自資院校想收到足夠學生，必須提升辦學質素。
正所謂，有意栽花花不發，無心插柳柳成蔭。港府搞普及高等教育搞咗咁多年，搞來搞去都搞唔成，依家因為生源下降而自動解決，係就係諷刺啲，其實都未嘗唔係一件好事。係人都知，喺知識型經濟嘅今日，全球一體化，競爭無疆界，人才就係決定勝負嘅關鍵，香港嘅大學升學率再唔追上其他發達地區，必然拖累整體競爭力。
當然喇，有利就有弊，教育界人士擔心，升學率提升將會導致學生質素參差，學位貶值喎。嗱，呢種講法實在值得商榷喇。教學教學，以教行先，教育水平係高係低，最大責任在於「教」嘅一方。近年香港教育亂象叢生，學位貶值，主要問題好明顯唔係出喺學生身上，而係因為港府監管不力，院校質素參差，誤人子弟。教育界與其擔心學生質素下跌，倒不如問番自己：有無決心提升教學質素？
以歐美國家為例，大學升學率一向高過香港好多，整體教育水平亦明顯高過香港，點解？秘訣在於「寬進嚴出」，學生考入大學唔難，但必須經過學校嚴格教導，唔好教到好，唔識教到識，咁先至係教書育人嘅真諦吖嘛。
講開海外經驗，真係一匹布咁長。當年港府眼高手低，由海外引入副學士課程，之後就關人個關，無做好監管工作，結果橘越淮而為枳，副學士變成劣質教育嘅代名詞，自資院校見錢眼開，濫收學生有之，喺夜總會同街市附近教學亦有之，無奇不有，貽笑大方。嗱，為免更多學生受害，當局係咪應該盡快撥亂反正吖。
一句到尾，世上冇教唔好嘅學生，只有唔識教嘅老師。港府同教育界成日勸勉學生苦學成材、貢獻社會，自己都要勤勤懇懇做好份工，除咗提高升學率，仲要提升教育水平，雙管齊下，咁先至係正確嘅教育方向吖，知冇！