貪曾總算有樣叻，人家是「晚有弟子傳芬芳」，佢一手提拔嘅愛將——前廉政專員湯顯明之貪婪，牽涉的醜聞愈揭愈多，公費飯局攜女友出席、超豪外訪、狂送禮物，最搞笑嘅係一次攜帶多達六十盒餅，猶如「水貨客」……老朽話貪曾總算有樣叻，就係「晚有弟子傳衣鉢」——把舔到盡嘅貪婪文化傳開去！
湯顯明都算叻，佢唔鍾意「請人飲咖啡」，佢鍾意請內地高官飲茅台，完全改變廉署文化；佢唔單止丟盡廉署老祖宗姬達個面，亦令廉署自七十年代成立以來日積月累建立出來嘅金漆招牌，首次蒙上污點！
一張紙，皺了要整回直，好難！一張畫紙，塗污要修正，亦不易！今廉政蒙污，新政府一味話本屆官員好廉潔，當今廉政一哥冇送禮又冇飲飲食食，可是，市民至今未知廉署如何處理前任特首曾蔭權涉貪嘅調查，難道唔講又等如冇事發生？
再說，內地領導高調揚言要「蒼蠅老虎一起打」，把「權力關進籠子裏」，要反貪防腐，一新政風，可是，新政府上台，推薦了一位香港史上最貪的廉政專員做「全國政協」，如此，也難怪千年狐狸都可得道成仙，如此咄咄怪事，既好笑又諷刺！
明朝郭允禮說：「吏不畏吾嚴而畏吾廉，民不服吾能而服吾公；公則民不敢慢，廉則吏不敢欺；公生明，廉生威。」這幾句話是官場公認的「官箴」，尤其「公生明，廉生威」，今湯顯明涉「以權謀私」，以公帑大飲大吃、狂送禮，視「常規」如無物。
至於任職五年，期內只愛與內地高官杯上杯落，豪飲國酒茅台，把「肅貪倡廉」忘得乾乾淨淨，不公不廉，混帳一大堆，不徹查，「廉政公署」個招牌可以丟落鹹水海矣！