政情：克勤仔唔熟書（火羅）爆
教育局推行嘅學前教育學券計劃早前遭審計署揭露，部分幼稚園疑勁收生日會、畢業禮等雜費，更撥作「其他營運收入」企圖掩人耳目。立法會帳目委員會尋日公開聆訊時，議員陳克勤似乎唔係太熟所謂嘅幼稚園「雜費」為何物，叫當局規管埋家長教師會嘅活動收費，即罕有地被教育局副秘書長葉曾翠卿寸爆，反而局長吳克儉就坐喺度粒聲唔出。
教局副秘即場反駁
當各議員質疑緊幼稚園喺學券計劃下收取多項高昂雜費，質疑教育局欠缺監管時，克勤仔突然提到唔相關嘅家教會活動收費，佢話：「幼稚園家教會係幼稚園收費嘅另一途徑，例如家教會搞好多自費活動，呢啲有無規管呢？」其實家教會活動喺中小學、幼稚園都有，亦唔算得上係雜費，所以葉曾翠卿就辯駁話：「家教會活動唔單止喺幼稚園有，連中小學都有。」
佢仲似乎好不屑克勤仔嘅家教會言論，不禁輕輕「哼」了一聲，又繼續寸克勤仔話：「我哋係咪要微控一間機構嘅所有活動呢？中小學仲有舊生會……我哋要諗吓係咪要作咁嘅規管。」咁樣被副秘寸法，睇嚟克勤仔真係要惡補吓或諗清楚先提問至得喇。