政情：極速掃斷兩掃帚 譚志源「落力」交戲
被指「騷」味濃嘅「全城清潔運動」尋日踏入第二日，並由五位局長接力落區清潔。幾位局長吸取咗先頭部隊被揶揄表演好hea同掃假垃圾嘅教訓，尋日落場都格外出力。其中政制及內地事務局局長譚志源（Raymond）更喺短短幾分鐘表演時間內，極速掃斷兩把掃帚，真係交足戲！
話說Raymond負責清潔深水埗保安道街市，尋日一到埗就拎起掃帚不留情猛咁掃，掃帚期間更一度「卡」住喺馬路邊嘅欄杆，結果佢短短幾分鐘就連環掃斷兩把掃帚。難得Raymond相當阿Ｑ，力撐係自己太落力剷走地下嘅香口膠所致。其餘演出嘅仲有保安局局長黎棟國、環境局局長黃錦星、勞工及福利局局長張建宗（小肥張）等。
小肥張表演被騎劫
其中黎棟國就獲安排到黃大仙雙鳳街街市洗太平地，街市方面特登預留幾張長櫈，方便街坊坐低睇騷。黎棟國到場後亦冇令街坊失望，將原本已打掃得好乾淨嘅街市入口拖到立立令。但小肥張下晝落區就慘喇，被到場示威嘅碼頭工人騎劫咗個騷。