政情：民記新社聯 夾擊工聯會
距離區議會同立法會選舉仲有幾年時間，但各個政團已對所屬地區嘅劃界及新選區虎視眈眈，繼早前我哋報道過灣仔同東區可能重新劃區後，聽聞人口不斷膨脹嘅元朗區亦計劃新增三、四個新選區，除咗泛民主派插旗外，建制派內亦傳出內訌互片。據聞新民黨為擴大元朗版圖，先從中產區入手；至於民記就拉攏新界社團聯會（新社聯）硬撼不斷坐大嘅工聯會，預料將掀起一場惡鬥。
雖然暫時未確定政府會劃邊啲新區，但我哋收到風，元朗區建制派內部嘅惡鬥情況已喺現存天水圍北嘅逸澤選區出現。該區係白鴿黨嘅地盤，但工聯會已計劃派人落去插旗，而民記同新社聯嘅結盟隊伍亦諗緊搵人迎戰，雙方曾就出選問題協調過，但最後似乎傾唔埋欄，預料互撼情況在所難免。所謂「兩虎相爭，必有一傷」，甚至最後兩敗俱傷，喺建制相同票源分薄效應下，會令泛民得益。
聯名出選 陳勇掛帥？
其實自從工聯會同民記因為路線與立場唔同而分家後，雙方已經冇乜偈傾，喺上屆立法會及區議會選舉發生多次為撞區而爭拗嘅事件，同時新社聯亦多次表明想打響旗號派人參選，令建制派爭位情況更加緊張。
唔知係咪為免重蹈覆轍，民記最新公布嘅中央委員會名單，就搵咗新社聯理事長陳勇擔任副主席，除咗可以減少雙方因為爭選區而摩擦外，亦可聯手對抗地區發展迅速嘅工聯會。
不過，陳勇進身民記領導層後，新社聯就要暫時放棄自己打響旗號參選嘅大計，莫非真係改變唔到佢哋幫人抬轎參選嘅宿命？陳勇早前講過，民記係政黨，而新社聯係政團，兩者各有所長，亦係獨立個體，會合作但資源唔會合併。佢咁講法，意味嚟緊區議會同立法會選舉，新社聯同民記將會聯名出選，話唔定曾經想過參選新界東直選嘅陳勇，下屆代表雙方出戰都未定喎。