中環出更：「走私」北韓銀紙項明生搵命博
有「電玩達人」之稱嘅Sony Computer Entertainment香港分公司董事項明生（James），足迹遍布全球約八十個國家，儼如一名業餘旅遊家。前晚佢喺銅鑼灣一間書店舉行分享講座，同數十名粉絲暢談旅遊見聞。其中講到神秘嘅共產國度北韓，聽眾反應最熱烈。James仲展示以「行賄」手段取得，然後冒險由北韓「走私」出境嘅禁運品，包括銀紙、地鐵票，仲有一段段偷拍嘅錄影片段，認真搵命博。
靠朱古力利誘換取
James話，北韓仍然係封閉嘅社會主義國家，連當地貨幣都唔畀遊客使用，就算睇吓都唔得，遊客全程只可使用人民幣或歐元。James竟然出動朱古力、餅乾等自由世界嘅誘惑，半氹半呃，成功以物易物換取多項禁品，冒險精神十足。
雖然北韓處處都係對已故領袖嘅個人崇拜，就算出現喺街頭嘅路人甲乙丙，都被指疑似演員，令人發笑，但遊歷豐富嘅James對被列入健力士紀錄、由十二萬人一齊表演嘅巨型歌舞騷《阿里郎》讚嘆不已，笑稱只有共產國家才有咁嘅號召力。