燒臘掛行人路 影響衞生
家住長沙灣的陸女士不時到青山道一帶買菜，發現一間燒臘店常全無遮掩地將肉食吊掛行人路上，令地面布滿油漬，「啲燒臘成排成排咁掛喺度，啲汁同油滴晒落地下，真係好邋遢，條路多人行又逼，次次行過都好驚整污糟件衫！」
食物環境衞生署發言人證實，接獲本報轉介後曾派員巡查，發現該食肆沒有妥善儲存未有加蓋的燒臘，遂根據《食物業規例》檢控負責人，而該食肆過去兩年亦曾錄得三次相關檢控紀錄。發言人強調，任何人在食物業的運作中，未有將未加掩蓋的食物儲存妥當者可被檢控，一經定罪，最高罰款一萬元及監禁三個月。
「我依家都仲見到間舖掛啲燒臘喺行人路度，（食環署）應該告埋佢阻街啦！」陸女士要求食環署加緊執法，避免市民進食不潔食物，影響身體健康。