高官做騷，樂此不疲，今次又扮演乜嘢角色吖？咪又係獨沽一味清潔工囉。唉，來來去去都係呢套，就算港產官僚做唔厭，市民都睇到厭喇。
政務司司長林鄭月娥尋日率領食物及衞生局局長高永文等一眾高官，齊齊現身大埔墟街市，為所謂「家是香港」打響頭炮，浩浩蕩蕩，齊齊清潔。做生意無利不起早，做官嘅就無事不做騷，港產官僚紆尊降貴扮清潔工，話就話要洗太平地，預防禽流感，其實姿勢多過實際，純粹得啖笑嘅咋。
呢嗱，林鄭開工前先「正名」，話全城清潔活動唔係做「政治騷」，係要提高市民嘅衞生意識；而高永文就話根據過往經驗，冇疫症嘅時候市民警覺性較易鬆懈，希望大家關注公共衞生，唔好等疫症出現至做嘢喎。
嗱嗱嗱，雖然話官字兩個口啫，都唔可以有口話人冇口話自己o架。如果話市民較易鬆懈，咁政府高官嘅衞生意識又好得去邊吖？講到防疫，當局何止鬆懈，直頭係平時唔燒香，臨急抱佛腳喇，靠佢哋預防禽流感，打定輸數都得咯。
心水清嘅讀者一定記得，「全城清潔」呢場大龍鳳始於○三年，當年爆發沙士疫症，時任政務司司長嘅曾蔭權爵士獲任命為「清潔大隊長」，負責清潔香港，對抗疫症，當時官員空群而出，齊齊掃街，都唔知幾大陣仗。可惜虎頭蛇尾，做咗幾場清潔騷之後，就偃旗息鼓，不了了之。
直至○九年豬流感殺到，當局循例搬出「全城清潔運動」虛應故事。呢次由時任政務司司長嘅唐英年負責領軍，煞有介事咁周圍掃街抹窗洗地板，仲喺各區衞生黑點安裝閉路電視捉垃圾蟲，裝腔作勢。結果咪又係雷聲大雨點小，疫症過後，污糟照舊，衞生黑點打回原形，街頭巷尾一樣垃圾處處，烏煙瘴氣。最丟架嘅係，號稱國際大都會嘅香港居然淪為老鼠天堂，老鼠光天化日之下穿街過巷，目中無人，中環甚至發生老鼠噬傷外籍遊客嘅醜聞，簡直失禮死人！
即係咁，搞全城清潔運動唔係唔好，提高市民衞生意識亦唔係唔啱，問題係，如果當局平時懶懶閒，吊吊揈，等到疫症臨門先至做清潔騷，咁又有乜嘢用吖？唔通冇疫症就唔使清潔香港？
咪話功夫茶唔提醒，車公元帥同黃大仙預告香港今年多災多難，凡事不利，隨時有疫症流行，沙士慘劇可能重演，港產官僚請好自為之吖！