不甘寂寞嘅「民主阿婆」前政務司司長陳方安生自日前成立咗個政改新組織後，連日來四出推銷，尋日又再出席香港大學社會科學系舉辦嘅公開講座。本來佢主講香港點走民主之路，點知被台下人士翻舊帳，質疑佢既然講到民主咁好，點解喺做政府官員嘅時候唔推動民主，反而依家先嚟搞。呢位學生嘅質詢真係一針見血，當然搞到全場起哄啦！
民主阿婆就死撐話，北京喺九七之前應允香港享有自由、民主同普選，但到回歸後至今，香港民主進程仍然無改進，所以佢要做嘅只係要爭取民主進程喎。聽到佢呢個答案，大家會否覺得佢答非所問呢？現場仲有一位前公務員都質問民主阿婆，如果泛民主派冇同北京商量嘅能力，到時選咗佢哋出嚟咪好有風險？民主阿婆就話，一人一票普選係佢哋嘅希望，如果選民今次選錯，下次咪識選囉，佢真係講得輕鬆。
民主阿婆昨日除咗大談民主之外，佢仲話旗下組織係一個畀大眾發聲平台，籲商界發表相關意見時唔使太驚，而日後佢就希望多啲青年人向佢哋表達意見喎。不禁要問，究竟民主阿婆覺得自己同旗下組織有咩優勢，吸引到商界同青年人要選擇向佢哋發表意見呢？