中環出更：鄒秉基棄金融 做傑出退休人士
香港社會服務聯會（社聯）有份主辦嘅「傑出第三齡人士選舉」尋日舉行頒獎禮，卓妮都有去湊熱鬧，發現其中一位得獎者鄒秉基，五年前以四十九歲之齡就退休投身公益事業，最特別係佢嘅提名人竟然係機電工程署署長陳帆，原來兩人仲係喇沙書院嘅師兄弟添！
喇沙師兄陳帆推薦
有關選舉兩年一度，頒獎禮喺香港醫學專科學院舉行，中央政策組顧問兼前婦女事務委員會主席高靜芝、安老事務委員會主席陳章明、城市大學校長郭位、港燈營運董事阮水師等擔任頒獎嘉賓。今年合共有十二名來自社會唔同階層嘅退休人士獲得表揚，最年輕嘅就係現年五十四歲嘅鄒秉基。
提名鄒秉基參賽嘅陳帆話，佢同鄒係喇沙師兄弟，雙方認識咗幾十年，又指八二年畢業時一班工程同醫療界朋友一齊有做義工服務，因此創立工程及醫療義務工作協會，依家協會主席就係鄒秉基。
對於鄒秉基未足五十歲就喺金融行業退休，陳帆話依家港人壽命有八十幾歲，如果四十幾歲退休後就有四十幾年冇嘢做，又爆料話對方退休後先學識游水。至於會否考慮早啲退休做義工，陳帆就笑言自己有家庭負擔喎。
同樣獲獎嘅仲有退休文書主任黎耀勝，佢喺去年「十．一」南丫海難之後，響應非牟利團體呼籲加入「關懷海難特別事故小組」。對於近日有意見指出今年「十．一」不應該放煙花，黎耀勝對此並不認同，認為應繼續放煙花以掩蓋及淡化悲傷。
卓妮