潮流興罷工，繼碼頭風雲之後，話唔定香港將會出現另一個工潮。
今次醞釀罷工嘅係乜嘢人呢？即係咁，承接政府外判清潔合約嘅環境衞生業界大聯盟話呀，要求政府補貼工資差額，已經去信約見財經事務及庫務局局長陳家強反映訴求。大聯盟召集人表示，若然得唔到官老爺正面回覆，不排除五月一日停止向政府綜合大樓以及公園等等提供清潔服務，估計兩成公共服務設施受影響，唔講得笑。
大聯盟之所以要求政府補貼工資差額，導火線係五月一日開始生效嘅最低工資新水平，由目前時薪二十八元調升至三十元。召集人認為，唔少政府外判商嘅服務合約喺二○一○年或二○一一年首個最低工資實施前簽訂，合約期至明年或一五年初。政府於首個最低工資實施嘅時候向外判商提供補貼，下月最低工資將會調高每小時兩元，外判商聘用一萬名清潔工人，必須向每人每月額外支付五百幾元薪金，涉及大約六千萬元開支，政府應該一如既往再次補貼外判商。
簡單咁講，外判商同政府簽訂嘅合約係以舊時薪計算，家陣新嘅最低工資水平有變，外判商打死都唔肯支付額外薪金，否則可能蝕晒大本。
講到呢度，大家必定有一個疑問，工種外判等唔等於責任外判呢？既然政府係外判商嘅老闆，即係清潔工人嘅幕後大老闆啦，家陣最低工資水平有變，政府有冇責任為外判商解決問題呢？
面對外判商嘅訴求，政府發言人係咁講嘅，當局鑑於一一年五月實施首個法定最低工資嘅獨特性，以特事特辦嘅方式作出一次性嘅特殊安排，向相關服務合約承辦商提供補貼。政府已經多次向承辦商重申，有關補貼係一次性嘅特殊安排，唔會喺調整最低工資水平嘅時候再次提供補貼。
唉，睇怕勞工及福利局局長張建宗責無旁貸介入碼頭風雲之餘，亦有必要斡旋一下政府同外判商之間嘅矛盾，否則一旦清潔工人真係罷工，五一勞動節打後話唔定通街垃圾，抗菌防疫嘅「全城清潔大行動」出師未捷身先死。
計功夫茶話齋，外判商嘅訴求不無道理喎，合約以舊時薪計算吖嘛，家陣最低工資水平有變，政府作為大老闆係咪應該幫外判商解決問題呢？若然官老爺企硬一毛不拔，外判商話唔定會以「合約精神」辦事，向工人支付舊嘅時薪二十八元，到時肯定搞到一鑊泡。
講到尾，工作外判唔等於責任外判，當局最好切切實實同外判商討價還價，補唔補貼或者補貼幾多，三口六面傾掂佢。總而言之，香港已經夠亂喇，千祈唔好再搞出一個大頭佛呀！