貪曾前特首曾蔭權爵士一年前被揭廉價租住全國政協黃楚標嘅深圳禮賓府，貪曾同前廉政專員湯顯明情同兄弟，原來貪湯都受過黃楚標「恩惠」，拉線之人係另一縱橫政商界人物，前高官馬時亨（肥亨）。
話說貪湯擔任廉政專員之前，曾經喺○三年至○七年期間出任海關關長，而海關關長其中一個任務，係要幫海關其下嘅「香港海關人員子女教育信託基金投資顧問委員會」搵「大水喉」揼水捐錢，海關人員仔女出國讀書或留學都靠申請呢個基金，所以搞好呢個基金，絕對可以籠絡海關員工人心。當時貪湯唔識商界中人，但時任財經事務及庫務局局長馬時亨就負責做媒人，介紹黃楚標畀貪湯認識，之後黃楚標順理成章做埋投資顧問委員會委員，每年仲要向基金捐幾十萬元。
黃楚標向基金捐錢係正常做法，但之後貪湯有冇豪花公帑宴請黃楚標呢？黃楚標就話，真係唔記得有冇啲咁嘅事，亦冇乜印象同貪湯食過飯，不過佢就承認兩人經常去深圳打波，可以稱得上「波友」。我哋曾聯絡肥亨，但至截稿前未能聯絡上。