立法會審議財政預算案撥款「拉布戰」尋日進入第二日，繼財政司司長曾俊華前日表明政府唔可以長期靠申請臨時撥款度日，呼籲議員停止拉布後，財經事務及庫務局局長陳家強尋日就接力財爺曾俊華做人肉錄音機，話來來去去都係得四位議員發言不斷重複，又成日要求點算開會人數，希望拉布行動可以早日終止喎。佢又不厭其煩話，如果預算案唔可以喺五月中前通過，對政府嘅運作將會造成好大影響。佢同財爺講嘅嘢幾乎一式一樣，莫非財爺離開立法會前交低咗部人肉錄音機畀佢？
