政情：工潮「隱形處長」快閃避記者
貨櫃碼頭工潮持續咗成個月，勞工及福利局局長張建宗幾乎要日日出來為事件解畫，但奇就奇在佢下屬勞工處處長卓永興喺罷工過程中唔多見影，無咩見佢會見傳媒解釋吓勞工處做緊乜。卓永興尋日出席一個公開論壇，大家當然想問吓佢工潮嘅問題啦，點知活動未完佢已經「快閃」，完全唔見咗人影！唉，如果佢以「閃人」嘅速度同決心去解決工潮就好喇！
出席論壇 鬼祟消失
卓永興尋日下晝出席勞工處同職業安全健康局搞嘅高處工作安全論壇，論壇未開始前，記者已經同大會公關表明想同處長做訪問，問下佢處方會做咩協助解決工潮、高寶工人遣散進度等。到論壇中場休息，一眾嘉賓同參與論壇人士一齊步出會場，記者都到場外等卓永興，點知等極都唔見人，原來佢已經走咗！咁神奇？睇嚟都係鬼祟行後門走。
其實卓永興做「隱形快閃黨」都有前科，對上一次係去年出席防暑運動，記者打算訪問佢防暑措施，點知佢又喺活動完咗就走咗入室內歎冷氣，佢嘅「快閃」速度，真係快到你唔信！