政情：立會大樓不防風黃雨濕晒
尋晚一場黃色暴雨，令落成唔夠兩年嘅立法會大樓又遇上考驗，大樓門窗成功防雨無漏水，但做唔到防風，令門外地下積水不停吹入大樓內，半個大堂都濕晒，搞到工作人員忙於吸水清理，好彩幾個鐘頭後乾番，無乜大礙，但只係咁啱停雨啫。如果有關方面厚臉皮啲，可以形容係「豬籠入水」好意頭都得o架！
職員軍人上身「防洪」
尋晚八點鐘左右，我哋喺立法會直擊呢場大雨，雨水不停從窗口吹入大樓內，搞到大堂濕咗大半，好彩立法會由開張至今，成日要執漏，所以秘書處職員都司空見慣，見到大堂突然入水時都冇慌張，反而好快諗到解決辦法，佢哋個個好似軍人上身咁，喺窗邊猛堆起沙包，防止雨水再次滲入大樓，又出動抽水機，將大堂積水吸走，似乎立法會早有準備，知道滂沱大雨下大樓分分鐘失守。
雖然最後都要靠停雨先至冇事，但秘書處職員都算有心，明知夜晚立法會冇乜人，佢哋都以封條圍住「濕地」，又加個「小心地滑」指示牌，避免有人滑倒。其實職員邊使搞咁多嘢吖，議員咁多人鍾意出嚟「抽水」，係咁意派一兩個議員到「濕地」指手畫腳，好快就抽乾啦！