近日火氣十足嘅前港區全國人大代表吳康民（康叔），不點名批評去年喺特首選舉鼓吹投白票嘅政黨係港英餘孽嘅第二梯隊，除咗觸發自由黨榮譽主席對號入座外，就連該黨創黨主席李鵬飛都澄清自己冇英國護照。尋日康叔再度撰文反駁，指李鵬飛曾被推薦做第一屆行政長官，先至冇被英國封爵同領取英國護照，否則已到英國當上議院議員了。
康叔尋日就撰文以「氣急敗壞，對號入座」為題，話如果李鵬飛認為英國人喺回歸後冇布線眼，冇幕後操縱政治人物嘅話，咁一係佢太天真，一係就隱瞞事實。
指李當年帶頭反廿三條
康叔仲連環向李鵬飛發炮，重提幾件舊事作例，佢話當年《基本法》第二十三條立法時，李鵬飛身為港區人大代表，竟帶頭危言聳聽，話廿三條立法後會「血洗中環」，又去參加反廿三條集會。
康叔嘅另一疑惑，就係九七回歸前，如果李鵬飛係愛國分子，應該多宣傳《基本法》，對香港高度自治作保證，但點解佢要替廿五萬港人爭取居英權呢？康叔仲教大家分辨何為「港英餘孽」，「港英餘孽」係一極小撮嘅人，只要睇吓佢喺「政治緊急關頭」時刻，到底係咪維護大局，定係背後捅人一刀，就知一二，群眾眼睛係雪亮嘅。