政情：民主阿婆厚顏 扮商界代表

政改新搞作 亂咁發「偉論」

民主阿婆為咗突出自己新搞作同真普聯、戴耀廷等人有唔同，近日四出強調自己個新組織有商界支持，零舍唔同，但點解唔肯加入其他組織，佢就話自己親自接觸好多商界人士後，發現商界對政黨存有戒心，個個都怕自己同泛民政黨扯上關係，搞到影響內地生意，所以佢先至另起爐灶搞新民間組織喎。佢扮晒好熟悉商界，懶係語重心長咁講，其實商界力量好大、喺社會好有影響力，但如果唔幫自己發聲，令商界置身事外，遲早會受到影響，因為政治環境最終會影響營商環境？佢又話換轉係其他民主國家，商界好積極參與政治，唔明港商界點解咁顧忌政治。

民主阿婆代表商界人士？真係聞所未聞，一百歲唔死都有新聞聽。尋日喺立法會，本身已經唔喺商界出選嘅田少就自動化身成商界代表，主動回應民主阿婆嘅「商界論」。田少話商界唔係對政黨有戒心，商界只係想要和諧嘅營商環境，唔想好似現時長江中心咁，日日都企滿晒罷工工人，唔通叫人唔好入中環？

民主阿婆講過，自己個新組織有最後底線，就係政改方案一定要符合《基本法》同《國際人權公約》，田少聽到呢點後又再反駁，話商界一向支持政府依照《基本法》施政，但無商界講過話支持乜嘢公約，佢話證明咗民主阿婆唔熟商界，捉唔到商界關注點。

乜都關佢事 似街市吹水

不甘寂寞嘅民主阿婆，除咗扮商界講政改，尋日仲講到前廉政專員湯顯明同勞工及福利局局長張建宗，佢呢頭就話自己唔會委任貪湯做廉政專員，嗰頭又話張建宗講嘢慢，總之乜都關佢事。咁多意見，星期日去「城市論壇」嘅台下發表吓囉，或者去街市，同啲師奶吹吓水，一樣得，不過就唔好扮商界嘞，好易穿崩o架。