中環出更：葉劉揭前下屬「湯」客飯局
時下女性參政已唔係新鮮事，尋日香港青年聯會賢慧社舉辦「女性與政黨發展」午餐講座，搵咗行政及立法雙料議員葉劉淑儀主講，葉劉由女高官變身，自然好有心得。近期前廉政專員湯顯明（貪湯）嘅醜聞愈爆愈多，講過對呢位前下屬表現「好傷心」嘅葉劉，言談間不經意踢爆，當年佢做保安局局長時，做佢下屬嘅貪湯成日想約商界人士同佢食飯，幫人拉關係，好似做咗佢經理人咁。
「叫過佢唔好咁多應酬」
葉劉坦言，當年做局長平時嘅工作已經夠晒忙，邊得閒招呼貪湯啲商界朋友吖，有時間都湊女好過啦！葉劉又語重心長話，當年已話過貪湯，唔好咁多應酬喇！葉劉唔講，真係唔知貪湯十年前已經咁識拉關係，唔怪得識到咁多商界高球波友，卸任廉署專員後仲撈番個全國政協委員做吓喇！
尋日講座吸引好多靚女參加，除咗賢慧社主席羅詠詩、副主席周沁之外，仲有女律師協會會長陳慧蕊、前中華總商會會長蔡冠深太太蔡關穎琴及仁濟醫院總理鄧肇殷等人。葉劉話，女性從政比男性難，事關女性嘅黃金時間要拍拖、結婚及生仔，等到有時間同精力投身政黨時，已有番咁上下年紀。不過，女士入政黨都有着數，因為靚女選舉時企街站，自然被人望多兩眼。
指出女性勤力易升官
至於做官，女士更易上位，因女仔勝在可靠勤力，最重要冇咁多「課外活動」 。咁女高官面對男下屬傾慕時應點處理呢？葉劉打趣話女士自然有智慧應付，但佢就冇講自己有冇艷遇囉！臨散場時，大會贈送一紙感謝狀畀葉劉，葉劉又忍唔住話，送呢啲咪幾好囉，唔使送相機喇！咦，佢係咪寸緊貪湯送相機呢？
卓妮