爆燈喇！爆燈喇！空氣污染指數又爆燈喇！
環境保護署多個監測站前日錄得超過一百嘅甚高空氣污染指數，中環同旺角路邊監測站更加一度突破二百嘅爆燈水平。撇除一○年沙塵暴襲港，前日嘅空氣污染指數直逼最高紀錄。
唉，香港嘅空氣長期污染，幾時先至可以呼吸新鮮空氣呀？幾時先至望得見藍天白雲呀？夜幕低垂嘅時候，功夫茶真係好懷念滿天星斗嘅浪漫氣氛囉！
污染空氣嘅罪魁禍首之一係「路上墨魚」，即係大量排放廢氣嘅車輛，尤其係舊式大型貨車，噴墨嘅威力簡直係驚天地泣鬼神。有見及此，特區政府一月發表嘅施政報告提到，撥款一百億元協助運輸業界分階段淘汰舊車，並且期望二○一九年滅絕高度污染嘅殘舊車輛，政府給予車主嘅資助上限係車價三成，視乎係以舊換新抑或係注銷舊車而定。
動用一百億元減少墨魚噴墨，驟耳聽落算係幾有陰騭嘅施政，如果能夠將現有八萬八千部歐盟前期至歐盟三期嘅老餅商用柴油車撤換，全部變成排廢量少嘅新車，當然係令人引頸以待嘅好事啦。之不過問題係，港式官僚一向有個戒極都戒唔甩嘅壞習慣，就係本末倒置嘞。
對於以公帑利誘換車嘅計劃，首先係運輸業界嫌一百億元唔夠喉，建議大手加碼至一百六十億，車價三成作為上限嘅資助額亦好難吸引車主以舊換新。其次咯喎，環保團體地球之友認為成個計劃好有問題。
即係咁，按照政府嘅方案，車齡少於十年嘅歐盟三期柴油車得到嘅協助最多，劏車可獲一成八津貼，劏車加換車就有三成。車齡多於十年嘅舊車又點呢？唔好意思，愈舊愈少津貼，有十八年車齡嘅歐盟前期舊車攞去劏，只得一成津貼。換言之，最舊最污染嘅老爺車冇足夠嘅經濟誘因撤換，反而比較新嘅歐盟三期柴油車就有機會消失，你話唔係本末倒置係乜呢？「劣幣驅逐良幣」大家聽得多，家陣嘅情況係「劣車驅逐良車」。
地球之友高級環境事務主任周月翔就話嘞，估計花費於歐盟三期車輛嘅津貼額係接近四十億元，取締之後只能減少排放一成一懸浮粒子，如果係取締歐盟前期同歐盟一期嘅舊車，減排六成七懸浮粒子。喂，講緊減少排放廢氣喎，梗係優先淘汰高排放量嘅路上墨魚o架啦！
所以話啫，有陰騭嘅施政唔代表係有成效嘅施政，如果官老爺唔將自己嘅舊豬腦換上新人頭，換車計劃對於改善空氣污染嘅作用有限o架咋。具體咁講，愈舊嘅車應該得到愈多嘅經濟誘因呀，懵丙！