落地玻璃 睇住人打
眾所周知，高球係政圈中較多人玩嘅運動，但又關麒麟山莊咩事呢？原來離山莊唔夠五分鐘路程，就係深圳出晒名嘅西麗高爾夫球俱樂部，雖然係超級方便，但班政界人士上得去麒麟山莊，都係聽內地官員講話，所以邊度得閒打波吖！
不過，冇得打波都未算最慘，有政界高球愛好者爆料話，最慘係麒麟山莊其中一個會議廳，有好大塊落地玻璃，一望出去就係偌大嘅高爾夫球場，見到球場上人人都好開心咁揮桿打波，自己就要低頭聽悶話，呢個對比先至係最令人難受。
正因為咁，班政界波友最鍾意聽到嘅消息，就係麒麟山莊嘅會議安排喺下午，唔係因為佢哋想瞓晏啲，而係想先喺朝早打一輪波止癮，下午開會時就唔怕突然間波癮發作喇。