政情：施榮懷囝囝避一劫
美國波士頓馬拉松發生奪命爆炸慘劇，由於當地有唔少名牌大學，所以一向有唔少香港名人子女身處波士頓。好似中華廠商聯合會會長施榮懷，佢個大仔施湧樂就咁啱喺波士頓大學讀緊一年級，爆炸前半小時，湧樂又咁啱同幾位朋友去咗現場睇熱鬧，好彩睇一陣就返宿舍，
避過爆炸一刻。施榮懷話，收到阿仔報平安嘅短訊後，即時嚇一跳，雖然阿仔逃過一劫，都即時叮囑佢少啲去人多熱鬧嘅地方，盡量留喺學校。
單仲偕大仔照去參賽
立法會議員單仲偕細仔都係喺波士頓讀書，而且仲係運動健將，好在細仔唔鍾意跑步，亦冇去觀賽，佢先至冇咁擔心。反而身處華盛頓嘅大仔就同單仲偕講，已經報咗名參加嚟緊嘅華盛頓馬拉松，冇諗過因為今次事件而退出比賽，搞到放下心頭大石嘅單仲偕又提心吊膽，要苦口婆心咁勸大仔唔好跑，但似乎大仔堅持要跑。
至於行政會議成員羅范椒芬個仔畢業後仍然留喺波士頓工作，佢冇參加今次比賽亦冇去觀賽，但佢唔想羅太擔心，事發後即時以短訊向媽咪報平安，反而羅太當時仲瞓緊覺，完全唔知咩事，要到起床後先知阿仔安然無恙。