政情：通識試題嚇親陳維安
上星期中學文憑試通識科有一條題目問及立法會「拉布」，試題上仲拋出咗一個一千二百萬元嘅開支數目。立法會秘書長陳維安（Kenneth）之前做過教育局副局長，雙重身份下當然留意到呢條通識題，不過就畀嗰千二萬嚇咗一跳，因為唔知條數喺邊度嚟。
取自王國興計法
拉布虛耗光陰又嘥電，不過就算有議員喺特別財務委員會問到上次拉布開支多少，秘書處都不能提供準確答案，原因係立法會喺拉布期間無涉及真金白銀嘅額外開支，職員好多都係超時工作，所以無法計算。Kenneth畀條題目嚇親之後，當然要細心查找一番，終於發現條數原來來自喺開會期間以「日以繼夜，夜以繼日」名句突圍嘅立法會議員王國興。秘書處翻查剪報，根據王國興嘅計法，計埋議員、職員人工，再加上會議廳燈油火蠟等，估計每日拉布開支達一百萬元，拉布十二日，計計埋咪就係千二萬囉。查找到出處，Kenneth至無咁驚。
撥款條例草案拉布即將展開，立法會今次有四百七十萬元嘅預算開支，因為預計會聘用臨時工應付。咁又係，次次要職員OT，唔係咁公道嘅。