政情：鄉局新大樓 愈執愈漏
新界鄉議局位於沙田石門嘅新大樓，由籌建到落成用咗五年，建築費亦由幾千萬超支到近二億元，大樓外表睇落真係誇啦啦，但可惜內部甩漏多到嚇親人。自前年新大樓入伙以來，已先後被牆身滲水、大劇院舞台地板及工程費債務問題困擾，點知最近仲發現原來大樓嘅電力裝置唔符合法例規定添，又要使多筆錢執漏，究竟邊個要為以上種種問題負責呢？但好似咁耐都未有人提出要追究責任，認真和諧。
改動電器 添置保安設備
鄉議局新大樓管理委員主任委員劉業強（Kenneth）尋日喺鄉議局執委會中，申請撥款十萬元，作為電器改動費用及購置保安設備費用。點解新大樓咁快又要改動電器呢？原來早前有專業人員為大樓進行電力測試時，發現大樓內部分電力裝置唔符合法例規定，聽聞有可能係之前裝設電力裝置時出問題，所以局方要搵間工程公司搞掂佢，否則就攞唔到機電工程署嘅證書喎。
Kenneth仲建議，新大樓建築工程專責委員會同大樓承建商開會時，要拗吓點解會出現呢個問題，仲要檢查大樓內有冇其他配套設備有類似情況。據了解，今次大樓除廚房電箱要改裝外，電線、電掣房嘅地線同插蘇等統統都要整，費用要成六萬元。至於保安設備方面，鄉議局為慳番中介公司嗰一筆，決定自購設備，由鄉議局去聘請保安人員，所以前後加埋要用多十萬元，開支認真大。
面對新大樓建築費債務問題，聽聞鄉議局最近又再籌備將九龍塘舊址招標，而條件係要求有興趣嘅買家先支付五百萬元誠意金，之後就以價高者得嘅原則出售。不過，鄉議局有權喺競價過程中撤回出售物業。
多層丁屋 擬赴深圳取經
另外，鄉議局新界傳統權益委員會主任委員梁福元尋日提案討論到「多層丁屋發展」，佢建議香港可參考內地，讓丁屋向高空發展，起至六層或九層高，咁就有助解決丁屋問題。與會委員似乎都幾贊同，仲計劃由主席劉皇發帶隊，組團去深圳取經，以便日後有足夠資料撰寫報告，準備向政府爭取咁話。