中環出更：曾鈺成懷「緬」難忘搭「牛的」
立法會拉布戰即將舉行，講明會「剪布」嘅立法會主席曾鈺成唔知係咪要養精蓄銳，早排復活節假期就同咗太太去緬甸旅遊，順便叉叉電放鬆一下。緬甸封閉咗三十幾年，近年先開放，即刻成為熱門旅遊勝地，到底有乜嘢吸引到曾鈺成呢？佢就話最難忘一定係坐的士。
坐的士都咁特別？當然唔係普通的士啦，曾鈺成話由於緬甸太落後，但近年又突然湧入好多遊客，所以唔少鄉郊地方都出現咗一種「牛的士」，即係牛力車，最搞笑係為咗畀外國人知道有的士可搭，牛力車車頂專登寫住「TAXI」以資識別，牛的士一啲都唔貴，十幾分鐘路程都係港幣廿蚊左右，非常抵坐。
民風樸素 大受感動
雖然緬甸比較貧窮，四周嘅民房簡陋，但曾鈺成話同仰光大金塔相比有好大落差，成座大金塔表面鋪上黃金，望落去金碧輝煌宏偉壯觀，非常值得旅客遊覽。當地民風之樸素亦令曾鈺成大受感動，小朋友見到遊客都樂意合照，更加唔會伸手要錢，同其他旅遊發達嘅國家好唔同。曾鈺成仲話呢次緬甸之旅好幸運，本來酒店係郵輪嘅四等艙，但船公司將佢哋免費升級。
