中環出更：母編導 子出演 名人好戲派
醉心文藝嘅香港青年聯會副主席黃夢瑩（Monin）首次執導一齣講述勇氣嘅話劇《Facing Nastbad》，早前趁復活節喺香港藝術中心上演，演員有Monin嘅大仔Marcus、同為男拔萃家長嘅圓玄學院副主席湯修齊（Henry）等人，無論係編劇、導演或演員，全部由近廿位男拔學生及家長包辦。演出當晚，Monin老公兼中華出入口商會副會長許華傑特登抽空去為妻兒打氣，男拔小學副校長葉胡美娟睇完亦讚不絕口。
身兼編劇及導演嘅Monin話，佢經常到學校為同學仔講故事，兩個月前決定將故事搬上舞台，於是着手寫劇本，以佢平日講故事中嘅兩名主人翁——小精靈及小男孩為藍本，融入香港社會常見嘅問題，包括親子關係疏離及校園欺凌，帶出發人深省嘅議題。
湯修齊扮「壞爸爸」打仔
今次演出嘅同學仔都係三年級，Henry大仔Harris雖然讀緊五年班，呢位家長受Monin號召，都粉墨登場，飾演壞爸爸一角。原來Henry係「微笑行動」執行委員，而Monin就係名譽法律顧問，兩人早喺成為男拔家長前已相識。Henry話，佢飾演一名表面風光嘅太平紳士，但回家卻打孩子出氣，十足反面教材。實情佢教導一對子女嘅方法係講道理，唔明講到明為止，一定唔會郁手囉！
Henry嘅太太Yvonne及囡囡Athena都去做觀眾打氣，唯獨唔見囝囝Harris，原來Harris跟隨學校去法國交流。Henry話，阿仔一年去足四次海外交流，出埠仲頻密過佢添！
卓妮