病床如戰場，防疫如打仗，家陣H7N9禽流感蔓延得咁快，簡直兵臨城下，隨時殺入重圍，係咪應該未雨綢繆做好防疫措施呀？死得佢吖，香港嘅衞生黑點居然多到得人驚，而且污糟邋遢嘅程度堪稱膽戰心寒，功夫茶真係擔心十年前嘅沙士慘劇會歷史重演囉！
H7N9鬼死咁難搞，禽流感疫情確係唔講得笑o架，肆虐華東不特止，連首都北京都失守，最新情況係擴散至華中地區嘅河南省。喂，病毒來源又唔知，點樣傳播又唔曉，再係咁樣東西南北蔓延落去，理得你係禽傳人定係人傳人，香港遲早會受到池魚之殃。照道理講，又係時候上下齊心搞清潔啦，學似電視宣傳短片話齋「唔好做傳染病幕後黑手」。之但係可惜吖，特區政府嘅衞生官僚好逸惡勞，惡劣環境依舊，防疫未打先輸。
本報記者巡視過十年前被列為衞生黑點嘅地方，發現黑點始終係黑點，完全冇變白嘅迹象，垃圾仍然四散，污水繼續長流。好似荃灣楊屋道街市咁吖，一地都係廢棄膠樽同發泡膠箱，菜檔賣剩嘅爛菜混雜污水非常惡心。北角春秧街街市更加觸目驚心，除咗紙皮、污水同發泡膠箱等等廢物混雜之外，後欄又猶如滿目瘡痍嘅垃圾房，堆放大量石油氣樽以及大型膠桶，部分甚至係建築廢料同用過嘅竹棚。
你知啦，垃圾不但會惹來蛇蟲鼠蟻，同時會吸引雀鳥覓食，而雀鳥極有可能就係禽流感嘅播毒元兇，點可能任由衞生黑點藏污納垢嘅呢？大埔元嶺村發現一隻孔雀，漁護署人員都全副武裝將自己包到密密實實先至奉命捉雀啦，萬一雀鳥喺垃圾堆覓食，然後飛入尋常百姓家將病毒傳播開去，到時就唔知點收科咯。
所以話啫，本地官場嘅特徵之一係好了傷疤忘了痛，十年前沙士瘟疫煙消雲散之後，當時政府高調推出嘅「全城清潔大行動」隨即鳴金收兵，好似冇事發生過一樣。目前嘅衞生黑點其實唔止街市同後巷o架，唔少大廈嘅平台同簷篷都係食物殘渣變壞變臭嘅溫床，政府如果唔派人去清理，漚下漚下一個唔覺意又係「雙疫齊飛」。功夫茶所講嘅雙疫，第一疫係內地爆發嘅禽流感，第二疫係困擾中東嘅新沙士。
即係咁，前特首曾蔭權未被揭發原來係貪曾之前，曾經做過掃街清潔大隊長，雖然洗太平地嘅成績一般，不過點都叫做好過冇，現屆政府係咪應該重彈舊調委派高官掃街呢？若然唔想香港未曾防疫已失守，當然要咁做啦，否則衞生黑點臭到嘔，即使唔係雙疫齊飛都會害到廣大市民百病叢生！