立法會聽日審議政府財政預算案撥款，社民連長毛梁國雄同人民力量三子講到明會堅持拉布，立法會批唔到錢，莫講話政府部門冇錢用，分分鐘連綜援戶都冇糧出。泛民為免背上癱瘓政府罪名，個個黨派都速速縮沙，唔敢拉布。公民黨就話費事市民有「拉布疲累症」，所以喺撤回之前修訂之餘，亦唔會就拉布修訂發言。民主黨講到明，話撤回修訂係唔想被外界曲解為佢哋支持拉布。而工黨就話，唔拉布係唔想佢哋要幫嘅對象成為磨心。總之議員由市民選出，做乜都要評估市民是否支持，否則玩大咗，下屆就拜拜嘞。
