政情：爆粗大狀落選中委 民記新班底多初哥
民建聯兩年一度嘅中委選舉尋日結束，接着而來嘅就會有於本周五舉行嘅正、副主席選舉。但就尋日嘅選舉結果所見，唔少首戰中委嘅候選人都已落敗，即係佢哋今次選舉「升呢」無望，其中一位就係早前因於立法會爆粗同「長毛」梁國雄舌戰而紅極一時嘅大狀馬恩國。其實佢之前接受查詢時已講明冇就選舉宣傳自己，當時大家仲覺得佢好有性格，但話說回頭，莫非佢早已打定輸數？
喺尋日完成嘅選舉結果顯示，新任嘅五十二名中委入面，除咗三十八人順利連任，另外仲有十四人為首戰或再戰中委嘅候選人。
而原民記副主席劉江華及前觀塘區議員陳百里因加入政府，自動退任嘅兩個中委位置亦疑由出任同區區議員嘅黨友頂替。
當中沙田區議員楊文銳、李世榮以及觀塘區議員柯創盛等為新任中委，首次參選嘅漁農界議員何俊賢亦成功當選。
至少3人為新社聯成員
今次新班底，民記中委銳意年輕化，同屬新界社團聯會成員嘅人數也有明顯嘅增長，十四名首戰或再戰並當選嘅中委入面，最少三人為新社聯成員，似乎民記有意公開同新社聯嘅政治姻親關係喎。