政情：重劃東區 福建幫執生
本報尋日率先報道，由於人口減少，東區區議會有可能要減少議席，將維園、天后等割畀隔籬灣仔區，減少兩區嘅人口差距。而喺東區好有影響力嘅福建幫，近年先將福建社團總會總部落戶天后，點知現時天后可能劃歸灣仔區，隨時打亂福建幫嘅如意算盤，要重新再部署至得。
多年來代表福建幫出戰選舉嘅民建聯蔡素玉（蔡蔡子）話，天后、維園等地歸入灣仔區都可以研究，但個人就唔贊成將北角一分為二，因為北角街坊會好混亂，無理由呢一條街係北角區，下一條街就變成灣仔區，咁搞法會影響政黨做地區工作嘅效率，市民唔鍾意，政黨亦唔會收貨。蔡蔡子仲大膽提出，如果要重新劃界，應該以北角海關總部大樓做分水嶺，以西嘅地方歸晒入灣仔，以東就納入東區，千祈唔好將北角民居劏成兩邊。
雖然東區嘅民建聯區議員對重新劃界一事持反對意見，但選舉時舉足輕重嘅福建幫就未有意見，暫時都未察覺到呢件事對佢哋有咩影響，有福建幫仲認為成個港島好多福建同鄉，點樣劃界都無乜所謂，影響唔到聯誼工作，至於選舉配票策略會唔會難做過以前，該福建幫就話未諗到咁長遠，總之目前未打算有任何反對行動。
有熟悉地區工作嘅人話，北角向來係福建幫嘅重要根據地，每次選舉都成為民建聯嘅黃金票倉，如果有一半福建幫票源被分去灣仔區，對港島區嘅整體形勢無乜大影響，因為福建幫嘅票，始終都會袋落民記袋，之不過各區區議會嘅勢力版圖可能要重新洗牌，例如當福建幫勢力進駐灣仔區議會後，灣仔區議會主席會否換人？同埋東區區議會係咪繼續由民建聯話事，定係畀工聯會上位？呢啲變動都好難估計。
康文署最頭痛
不過有東區區議員好肯定咁話，如果真係重新劃區，最頭痛唔係政黨，亦唔係福建幫，一定係康文署，因為各區嘅體育設施都規定喺一定數量，如果維園突然間歸入灣仔區，咁東區就會少咗大量康體設施，而康文署就要諗計仔起多幾個運動場畀東區。而且當整體東區區議員數目減少，亦代表每位區議員獲得嘅資源增加，分分鐘有着數添。