沒有最醜，只有更醜。前特首曾蔭權爵士貪腐醜聞街知巷聞，而被喻為佢「愛將」嘅前廉政專員湯顯明亦深得「曾傳」，任內唔止瘋狂外訪，仲不斷大手筆送禮，完全不知廉潔為何物。最荒謬嘅係，廉政公署內部對送禮及外訪居然全無指引，由湯顯明一個人話晒事，而廉政專員又只需向特首一人交代，簡直無法無天，點知佢哋有冇私相授受吖！
本報早前踢爆，湯顯明任內經常帶隊周遊列國，五年任期外訪三十四次，耗用公帑近四百萬元，成為歷屆專員之冠，被封為「旅遊專員」。點知醜聞愈揭愈多，佢除咗有鋪「遊埠癮」，仲有鋪「送禮癮」，五年任期花咗二十二萬元公帑送禮畀各地政府官員，多達一百三十六次，淨係一○至一一年就送禮四十二次，每次少則九十元，多則過萬元。你話喇，佢周遊列國，究竟係為咗宣揚廉政，定係為咗送禮呢？
其身不正，何以正人，身為廉政專員，湯顯明自己都不知檢點，仲有乜資格叫人肅貪倡廉吖。正如有立法會議員話齋，廉署規管公務員唔可以接受五百元以上嘅禮物，而廉政專員自己就亂花公帑大手筆送禮，簡直不知所謂。
呢，「東方報業民意調查」顯示，三成九受訪者批評廉署欠準則，審批程序須改善；兩成八人指廉署嚴人寬己，雙重標準；兩成二人直斥廉署無王管。至於廉政專員只需向特首交代，三成六受訪者認為容易造成狼狽為奸。
係人都知，湯顯明係「曾朋友」，當年明明已屆退休之齡，依然獲貪曾續約延任，齊齊做到最後一分鐘至收工。貪曾落台前夕仲特別召見湯顯明，兩人喺禮賓府密斟，究竟斟啲乜嘢，實在耐人尋味。唔怪得廉署立案調查貪曾超過一年，到依家仲係無聲無息，如果話冇官官相衞，真係搵鬼信！
講開又講，貪曾鍾意巴結富豪權貴，湯顯明亦不遑多讓，任內多次拜訪中聯辦及港澳辦，結果離任後即獲內地高校委任為特聘教授，仲做埋全國政協委員添，唔通真係「拿人手短，吃人嘴軟」，送禮有效？市民眼睛係雪亮嘅，四成三受訪者指湯顯明有違廉潔原則；兩成三人指佢大花筒，濫用公帑；兩成人直指佢同相關人士打交道，係為退休鋪路。
所以話，始終都係古人講得啱，上樑不正下樑歪。貪曾禍港七年，手下有樣學樣，人人爭做大花筒，有乜法子唔搞到成個政府烏煙瘴氣吖。計功夫茶話齋，再咁落去，唔使五十年不變喇，香港好快就同內地冇乜分別嘅咋！