政情：今日你上鏡：議員變通渠老「手」
食物及衞生局局長高永文上星期先話將於月內與全港各階層合作推出清潔運動，政府官員亦會親身參與。
不過，民建聯譚耀宗尋日就急不及待動員黨友，全副裝備清潔後巷。各人乍見後巷衞生惡劣，亦難掩驚訝之情，小巷「嘩」聲此起彼落。這邊廂立法會議員陳恒鑌變身「通渠佬」用掃帚通渠，篤吓篤吓不亦樂乎。另一邊廂，漁農界立法會議員何俊賢就戴住手套表演「徒手通渠」（見圖），在場人士睇到目瞪口呆，但何俊賢就輕描淡寫話，每逢屋企廁所塞，佢都係用手搞掂，因為住家渠「大約都知入面塞咗咩」，所以多數一通就得，不過通渠經驗豐富如佢都對尋日嘅「萬年瘀塞」束手無策。
（梁卓怡攝）