雖然新一屆立法會選舉三年後才舉行，但如果政團要派人參選早就要諗定擺位，開始落區插旗。其中聽聞「計劃」參選多年嘅港九勞工社團聯會（勞聯）或有機會再戰地區直選，但喺呢個計劃進行過程中，似乎遇到唔少難題，例如出選邊區、派咩成員出選等，樣樣都諗到領導層頭都大埋。所以，最後計劃變成點，可能連決策人都未知道。
其實我哋早前都講過勞聯落實咗招募會員計劃，而且以平均每月招募一千人為目標。聽起來好似好大想頭，但有熟悉勞聯嘅人士透露，其實呢個目標係可行嘅，若要貫徹該會嘅終極目標，即參加立法會地區直選嘅話，擴大該會網絡係事在必行嘅工作。
勞聯現已開始培育新星，搵咗唔少年輕會員擔任理事會職務，但依然面對同一問題，就係諗唔掂喺邊區出選。
有關人士話，根據勞聯上屆立法會選舉完成嘅研究報告顯示，該會會員主要來自新界西，而領導層人員就來自新界東，啲屬會就喺九龍西，所以單係喺邊區出選，啲領導都諗唔掂，加上要派邊啲成員去選，亦未諗到。
照咁睇，似乎勞聯呢個直選目標有啲虛幻喎！